Friday, August 24, 2007

ನನ್ನ ಮುಡಿಯ ಮಲ್ಲಿಗೆ..


ನನ್ನ ಮುಡಿಯ ಮಲ್ಲಿಗೆಯಲಿ
ನನ್ನತನವೆ ಅಡಗಿದೆ
ಅಂದದೊಡನೆ ಬೆರೆತ ಗಂಧ
ನನಗು ಅದಕು ತಿಳಿದಿದೆ


ಎಲ್ಲೊ ಒಂದು ತೊರೆಯ ಜಲದ
ಸಾಕುವಿಕೆಗೆ ಚಿಗುರಿದೆ
ಭೂಮಿತಾಯ ಅಪ್ಪುಗೆಯಲಿ
ಒಲುಮೆಯೊಡಲಲಡಗಿದೆ


ಜಾವದೊಡೆಯ ಒಲವ ಗೆಳೆಯ
ರವಿಯ ಬರವಿಗರಳಿದೆ
ಮಧುರ ಸಮಯ ಮಧುರ ಸ್ಪರ್ಶ
ಮಧುರ ಮಿಲನಕುರುಳಿದೆ


ಒಲವ ಪಾಠ ಪ್ರಣಯದೂಟ
ಹರೆಯ ಬಂದ ಮಲ್ಲಿಗೆ
ಬೆಳಕ ಕೊಟ್ಟ ರವಿಗೆರೆದಳು
ಪರಿಮಳಗಳ ಮೆಲ್ಲಗೆ


ಮತ್ತೆ ಬಂದಳೆನ್ನ ಮುಡಿಗೆ
ಎಲ್ಲ ಬಿಟ್ಟ ವಿರಹದಿ
ನನ್ನ ಗಂಧವೆಲ್ಲ ನಿನಗೆ
ಅಂದಳೆನ್ನ ತರಹದಿ


ನನ್ನ ಮುಡಿಯ ಮಲ್ಲಿಗೆಯಲಿ
ನನ್ನದೇನೆ ಕಂಪನ
ಒಂದು ದಿನದ ಬಾಳ್ವೆಯೊಳಗೆ
ನನಗೆ ಅವಳೆ ಸಾಂತ್ವನ


- ವಿನಾಯಕ