Sunday, June 22, 2008

ಒಲವಿನದೊಂದು ಗೂಡು ಕಟ್ಟಿ....

ಒಲವಿಗೊಂದಿರಲಿ ಸಾಕ್ಷಾತ್ಕಾರ,
ಆರಿತೊ ಅರಿಯದೆಯೊ ಬಿದ್ದ ಮೇಲೆ
ಪ್ರೀತಿಯ ಹೊಳೆಯಲ್ಲಿ,
ಮುಳುಗಿದರೇನು,ತೇಲಿದರೇನು..
ಇದ್ದೇ ಇದೆ ಹನಿ ನೀರ ಪ್ರೀತಿಯಪ್ಪುಗೆ
ಮೈತಂಪಿನ ಪುಳಕ
ಮನದಣಿಯೆ ನೆನೆ ನೆನೆದು
ತನ್ನತನವ ಕಂಡುಕೊಳ್ಳುವ ಬಗೆಗೋಸ್ಕರ
ಒಲವಿಗೊಂದಿರಲಿ ಸಾಕ್ಷಾತ್ಕಾರ..

ಒಲವಿಗೊಂದಿರಲಿ ಮೃದು ಝೇಂಕಾರ
ಪ್ರೀತಿಯ ಮಕರಂದವನ್ನು
ಮೈಗೆಲ್ಲ ಮೆತ್ತಿಕೊಂಡು ಗುಂಇಗುಡುವ ದುಂಬಿಯಂತೆ
ಹೀರಿಸಿಕೊಂಡ ಹೂವಿಗೂ
ಸಾಂತ್ವನದ ಸಾರ್ಥಕತೆ ಇತ್ತಂತೆ
ಆರಳುವಿಕೆಗೆ ಅರ್ಥ ಕೊಟ್ಟಂತೆ
ಹೊಗಳುತ್ತ ಬನವೆಲ್ಲ ಸುತ್ತಾಡಿದಂತೆ
ಒಲವಿಗೊಂದಿರಲಿ ಮೃದು ಝೇಂಕಾರ...

ಒಲವಿಗೊಂದಿರಲಿ ಆತ್ಮಾಧಾರ
ಹಂಚಿಕೊಳ್ಳುವ ಹೃದಯಗಳಿಗೆ
ಸ್ಫೂರ್ತಿಯಿತ್ತು , ಸುಖವನಿತ್ತು
ಆದರಿಸಿ ಪಾಲಿಸುವ
ಮಾತೆಯ ಮಮತೆಗೆ
ಕನ್ನಡಿ ಹಿಡಿಯುವ,
ಬಿಂಬ ಪ್ರತಿಬಿಂಬಗಳಂತೆ
ಜೋಡಿಯಾಗಿ ಜೋಡಿಸುವ ಆಶಯಕೆ
ಒಲವಿಗೊಂದಿರಲಿ ಆತ್ಮಾಧಾರ...

- ವಿನೂ..